CU LL'OCCHI E CU LLU CORE NNAMURATU

Cu ll’occhi e cu llu core nnamuratu…...

Dopu nu lungu viaggiu o n'avventura,

cu tornu allu paese miu nu bisciu l'ura,

e manu manu ca me stau pe bicinare

lu core intra allu piettu me sentu accelerare;

Rìatu ca aggiu a Lecce è sempre nu piacere

 e iddhru se apre a libbru e 'ncigna a cantare

na melodia d'amore, ca sulu ci ete

  nnamuratu te sta terra po sintire;

Scindendu versu casa me bicinu

 a nu mare azzurru verde e cristallinu,

cu spiagge bianche e splendite scogliere

ca parune pittate te n' artista ma su vere,

 istute te smeraldi e de culuri tantu rari,

 scrigni te bellezza senza pari;

Cu ll'occhi e cu  llu core nnamuratu,

me ccorgu puru te quiddhru

ca a ntra picchi anni, ahimè, ha cangiatu

e rimagnu scuncertatu,

cu bisciu lu Salentu miu sempre chiui abbandunatu,

  cu le antenne, le torri eoliche e li pannelli solari

 deturpatu e violentatu,
e lu presciu intra allu core 

ca prima mia pijatu,

lassa lu postu a na ""futtuta""nostalgia 

 pe llu tiempu passatu,

e pe dhre cose belle, ca ci nu nc'ete chiui,

 cu tanti sacrifici 'ndà tramandatu.

Me torna la memoria all'arbuli te ulia secolari,

ca comu li diamanti sta dentane sempre chiù rari,

giganti nnutusi comu le mani sapienti

 e spaccate te ci pe seculi l'ha coltivati,

cu tanta fatica e cu buttu te velenu

pe picchi risultati.

Me torna intra li campi te granu

e alle messi te na fiata,

 fatte cu le faugi ancora a manu,

all'orgiu, alli ciciri, alle fae e alle tante granaglie

battute e intulisciate, cantandu allegramente
 sutta chientu, subbrha all'aie.

Me torna intra le tante verdeggianti vigne,

  ca inijane coltivate cu passione

 e cu fatica 'ntornu a Borgagne,

 e alle tante vendemmie fatte in cumpagnia

 cu li parenti e li vicini te casa in allegria.

Me torna 'ntra lli sciardini ben curati,

cinti te muretti a seccu sulli quattru lati,

 cu site, limoni,  marangi, 

emandarini profumati

e frutti te ogni specie prelibati,

vigilati giurnu e notte dalle pungenti guardie

te l'arbuli te bianche, russe e verdi ficalindie.

Cu ll'occhi e cu llu core nnamuratu,

me torna la memoria alle petre grandi e vecchie

puggiate sulli lati te le specchie,

te seculi surdati e generali,

a guardia te l'arbuli te ulia monumentali,

strappati alla madre terra, induti e fatti a sordi

te patruni ignoranti e 'ngordi,

ca comu schiavi incatenati,

 te notte scusi, scusi,

 luntanu te sta terra su stati depurtati.

Cu ll'occhi e cu llu core nnamuratu,

  me torna la memoria alle tante masserie abbandunate,

te li latri e te lu tiempo distrutte e depredate,

alli uccali te li puzzi, alle pile e alli piluni,

all' arie, alle chianche, alle ozze e alli capasuni

rubati e luntanu te sta terra collocati

cu belliscane le ville, le case e le dimore 
te forestieri altolocati,

cu sta terra noscia, mancu mparentati.

Cu ll'occhi e cu llu core nnamuratu,

me ccorgu cu piacere

ca a intra  a Burgagne miu ormai su riatu,

e comu n'arcobalenu inaspettatu,

me torna intra allu core lu presciu e  l'orgogliu 

te fiju te sta terra... ca prima mia lassatu.