L'ORU TE LU SALENTU
Regina te l’oiu pe' li seculi
si stata terra mia,
oru a canali culavi te le presse ogni annata,
moi invece, culane lacrime mare te l'occhi te la gente
ca stae confusa e disperata;
Te peste tutti quanti mmalazzara
e nun c’è cchiui n’arbulu ca è sanu,
la niura sorte l'ha cundannati
a morte onza... onza, chianu...chianu;
Cu le razze auzate a 'ncielu,
scheletri bbandunati te ogni età,
cercane allu mundu n’aiutu ca nu rria
e 'mplorane pietà;
Comu lucigni o lampe ardune martiri innocenti
crisciuti cu le lacrime e culli sudori te tutte le sue genti;
Senza armi e fore te trincea isciu morti e
feriti ca continuane a catire
e lu core miu, strazzatu, continua a sanguinare.
Te dhru passu passu isciu terre bbandunate,
cruci minate a 'nterra e sfregi alla memoria
te na Regina ricca, rimasta all’improvvisu nuda,
senza ori... e puru senza storia.
 |
