NATALE TE NA FIATA ERA CHIU' BEDDHRU...

Natale te na fiata era chiù beddhru

Lu giurnu te l'Immacolata

intra ogni casa se facia lu presepe e all'alberellu,

cu le montagne bianche, la nìe finta, lu muschiu,

 la cascata cu l'acqua e lu ruscellu.

La lavandaia cu li panni a manu,

 lu laghettu cu le paparelle,

l'angeli annunzianti, li pastori

e tante pecorelle.

Subbra allu ponte nu viandante cu lu ciucciu,

na vecchia contadina cu a manu nu cappune

e nanzi alla grutta

na giovane ca se tene strittu a  mpiettu nu vagnone,

lu pastore durmiente, quiddhru te la meravija

 e quiddhru te l'adorazione.

Sulle montagne li Re Magi subbra a tre cammelli

cu l'oru, l'argentu e la mirra e li doni chiù belli.

A nfacce allu parite su nnu fogliu pittatu

 na grande cumeta e lu cielu stellatu.

Sutta nu paesaggiu fattu te casette 

  te cartune colorate,

cu li lumini intru, tutte illuminate.

Intra na grutta fridda lu bue e l'asinellu ncuati

e  nnanzi alla naca cu la paja, 
la Madonna e San Giuseppe nginucchiati.

Natale te na fiata era chiù beddhru...

Quandu se bbicinava la vigilia, 

intra alle curti e sulle strade

se sintia lu ndoru te le pittule,

 te li purciddhruzzi e te le cartellate.

Sulla chiazza ncera aria te festa

e tra luci, scintille, 

fischiali e llu rumore  forte te li troni,

 comu per incantu,

tutti li cristiani se stringiane le mani pe l'auguri, 
se baciavane e ddintavane chiu boni.

Nun' cerane li sordi e l'ansie te moi e tutti li turmenti

pe li regali te l'urtimi mumenti pe la zita, 

la mujere, li fiji e tutti li parenti,

se vivia cu dhru picchi ca ncera

ed erame tutti chiù felici e cuntenti.

Natale te na fiata era chiù beddhru...

Puru tra le famiglie povere senza na condizione,

prima te  Natale cuminciava lu ane e bbieni

te dhre picchi cose fatte a casa,

in segnu te auguriu, te pace e te condivisione.

Natale te na fiata era chiu' beddhru...

La notte te Natale tutti stritti ntra la chiesa

 cu bbitimu nascire lu Bambinieddhru

cu  llu core curmu te speranza 

e desideriu te nu futuru chiù beddhru.

A fine missa nde facimme l'auguri tutti quanti e cuntenti

scimme casa pe casa cu facimu l'auguri alli genitori,

 alli nonni, alli zii e a tutti quanti li parenti.

Lu giurnu te Natale a ntaula nui vagnoni

recitamme le poesie e facimme la promessa

 ca ijame bbessire chiù boni.

La letterina sutta allu piattu te lu papà 
 facia tanta tenerezza,

ma lu rigalu chiù bellu... 
era quiddhru ca nde tia la mamma,

na carezza.

Natale te na fiata era veru, 
sinceru e senza tanti paramenti,

 te inchia lu core d'amore e purtava a tutti

boni e sani sentimenti

e puru se era chiù poverieddhru,
 

Natale te na fiata era chiu' beddhru!!!

P.s. Molte famiglie in discordia da tempo, 

con l'aiuto di conoscenti comuni,

approfittavano del Natale per fare pace

 ed era per tutti una grande festa.